વધારી દે

વધારી દે

માંહ્યલામાં એટલી મિલકત વધારી દે,
છેક ભીતર કોઈની સોબત વધારી દે.

હું પીઉં મૃગજળ કે પીઉં ઓસના બે બુંદ,
પણ છીપે મારી તરસ ધરપત વધારી દે.

આમતો કોઈ લત નથી પાળી જીવનમાં મેં,
પ્રેમ કરવાની છતાં આદત વધારી દે.

દૂર જાવાનો હવે ક્યાં પ્રશ્ન ઉદભવતો,?
થઇ શકે તો થોડી તું કુર્બત વધારી દે.

દોસ્ત, મારી સાથ પાકી દોસ્તી બાંધી,
આ જ રીતે બસ જરા શોહરત વધારી દે.

ક્યા સુધી નફરતના કાયમ પોટલાં બાંધીશ?
એના કરતાં ગજવે તું ચાહત વધારી દે.

એક છે ઈલાજ તું અજમાવી જો, બંધુ..!
ખુશ રહે, ‘આનંદ’ની સંગત વધારી દે.

અશોક જાની ‘આનંદ’

ફિણ મોઢામા આવી જશે મોતનું
તુ ઇચ્છાઓ નાહક વધારી તો જો

જલન માતરી