શબ્દસેતુ

શબ્દસેતુ

સંસ્થા પરિચય

ગુજરાતી ભાષાને તાંતણે બંધાઇને આવેલ આપનુ હું હાર્દિક સ્વાગત કરું છું.  પ્રેમથી આવકારું છું.  શબ્દની ક્રીડા નિહારવી હોય, એનો આનંદ માણવો હોય તો આપની આ ઉડતી સફરમા અહીં થોડો વિરામ કરવો ઘટે!

આપણે બધા જ આપણી યુવાનીના દિવસોમાં કવિ દિલ હતા. દિલ ફેંક હતા.  રોમાંટિક શાયરીનો શોખ રાખતા, સાહિત્ય પ્રત્યે રૂચી રાખતા.  પરંતુ અહીં પરદેશમાં, કોંક્રિટના જંગલમાં, કોમ્પ્યુટરાઈઝ જીવન જીવતા, જીવનની જવાબદારીઓ નિભાવતા, યંત્રવત થઈ ગયા.  ચાર હાથે ભેગુ કરવામાં પોતાને શું ગમે છે એ પણ ભૂલી ગયા.  વાંચન, વિચાર વિનિમય, ચિંતન, મનન બધુ જ ફ્રિઝ થઈ ગયુ.

આજથી પંદર વર્ષ પહેલા બે ચાર મિત્રો સાથે ભેગા મળીને નિજાનંદની મસ્તી માટે “શબ્દસેતુ” નામની એક સાહિત્યિક સંસ્થા શરૂ કરી.  ‘શબ્દસેતુ’ નામનું સૂચન રજનીકુમાર પંડ્યાએ કરેલું.  સાહિત્ય જગતમાં ઘણું જાણીતું નામ.

શબ્દ એ વિચાર વિનિમયનુ માધ્યમ છે. મને તમને અને આપણા સહુને સાંકળતો સેતુ છે. શબ્દો બોલાય છે, સંભળાય છે, પડઘાય છે, ગુંજાય છે.

શબ્દસેતુ, એ સાહિત્યરસિકોની, એક મંડળી છે. ગુર્જરપ્રેમીઓની, એક ગોઠડી છે.  મહિનામાં એક વાર વાંચવા અને વહેંચવા, આ ગુજરાતી ભાષાભોગીઓ ભેગા મળે છે અને સાહિત્યની રસલહાણ લૂંટે છે.  કદિક સ્વરચિત રચના હોય, તો ક્યારેક અન્યની કૃતિ.  કવિતા, ગઝલ, ગીત, વાર્તા, કે લેખ, ગમે તે હોય. સાથે બેસીને આરોગવુ અને માંણવુ એ એમનો નિયમ છે.  દેશ વિદેશથી આવતા, ગુજરાતી સાહિત્યના, જ્યોર્તિધરોને, આમંત્રવા, એમનો કાર્યક્રમ યોજી, એમને માણવા, બિરદાવવા, એમનું બહુમાન કરવું, એમની પાસેથી કાંઈક શીખવું, મેળવવું, એ શબ્દસેતુનું કર્તવ્ય છે.

શબ્દસેતુ ને લઈને વર્ષો પહેલાનો જે શોખ હૈયાને એક ખૂણે ધરબાઈ ગયો હતો, મરી પરવાર્યો હતો એ ફરી સજીવન થયો અને જોતજોતામાં સભ્યોએ સારું એવું સર્જન કરી નાખ્યું.  જે લખતા નહોતા એ લખતા થયા અને જે લખતા હતા એ વધારે લખવા લાગ્યા.  વાંચન, વિચાર, વિનિમય વધ્યા.  ભાગીદાર થવું હોય તો સંપર્ક સાંધો.

Kishore46@hotmail.com or shabdsetu@hotmail.com or kishorecanada1@gmail.com

બીજાને ગમે કે ન ગમે પણ સર્જકને એના સર્જનનો આનંદ અનેરો હોય છે.

તમને જરૂર વાંચવુ ગમશે. એ માટે તમે સભ્યોનુ સર્જન ઉપર ક્લીક કરો.

તમારુ નામ શુભેચ્છકોની યાદીમાં જોવા સંસ્થાના શુભેચ્છકો ઉપર ક્લીક કરો.

કિશોર પટેલ – શબ્દસેતુ
જાન્યુઆરી ૨૦૧૦

શબ્દસેતુ એ ટોરોન્ટો, કેનેડાના કલાનુરાગી, કલારસિકોનું એક ટોળું છે. “ફેસબુક” ના અતિ પ્રચલિત શબ્દ ‘શેર’ ને અમે અમારો મંત્ર બનાવ્યો છે. તમારામાંથી કોઈને પણ લખવા વાંચવાનો શોખ હોય, સારી ફિલ્મો જોવાનો શોખ હોય, સંગિત, ચિત્રકળા કે ફોટોગ્રાફીમાં રસ હોય, તો આ નાના અમસ્તા ટોળામાં જરૂરથી જોડાવો. સરખા રસ ધરાવતા કલાપ્રિય મિત્રો મળશે, જે મોટે ભાગે આપણા મિત્રમંડળોમાં મળતા નથી. ટૂંકમાં ગમતાનો ગુલાલ કરીએ નિજાનંદની મસ્તી કાજે.

શબ્દસેતુમાં સભ્ય બનવા માટે કોઈ પણ જાતની ફી નથી. સંસ્થાનુ કોઈ માળખું પણ નથી, બધા જ સરખા – equal footing. જે સભ્યો અવાર નવાર શબ્દસેતુ ની માસીક બેઠકમાં આવતા હોય, એમની રચના પરસ્પર સંમતિથી સુધારી મઠારીને, વારફરતી થોડા થોડા મહિનાને અંતરે, શબ્દસેતુના બ્લોગ ઉપર પોસ્ટ કરવામાં આવે છે.

દર મહિનાના બીજા રવિવારે શબ્દસેતુના સભ્યો ટોરાન્ટો, કેનેડામાં બપોરે બે થી છ નીચે જણાવેલ જગ્યાએ ભેગા મળે છે.

Dennis R. Timbrell Resource Centre – Room # 2
29 St Dennis Drive
North York, ON
M3C 3J3
Canada

Please contact – સંપર્ક સાધો
Kishore46@hotmail.com or kishorecanada1@gmail.com

કિશોર પટેલ – શબ્દસેતુ
સપ્ટેમ્બર ૨૦૧૫.